Nú er komið nýtt ár en árið sem var að líða hefur verið ansi farsælt fyrir hina íslensku tónlistarútgáfu, Nordic Voyage Recordings. Útgáfan sem var stofnuð seinni hluta árs 2019 gaf út sína fyrstu smáskífu í mars 2020. Útgáfurnar urðu 12 alls á þessu ári og eru þeir Leon S. Kemp og Björn Salvador stofnendur Nordic Voyage kampakátir með árangurinn enn sem komið er.
Eins og fyrr sagði gáfu þeir út sína fyrstu smáskífu í mars, Destination með Birni Salvador. Þar var einnig að finna endurhljóðblandanir, eða remix frá Hólmari, Savvas og In.Phrequent. Einnig í mars gáfu þeir út lagið Ruff ‘n Tumble frá þeim Birni Salvador, Leon S. Kemp og Phillip Charles. Destination var í 6. sæti á Party Zone listanum í marsmánuði og náði Voyage í sæti númer 21 í aprílmánuði hjá strákunum í Party Zone.
Í apríl kom út þriðja smáskífa Nordic Voyage, Voyage með Birni Salvador, en þar var einnig að finna remix frá þýska tónlistarmanninum Paul Hoffer. Paul átti einnig eftir að gefa út meira efni á Nordic Voyage seinna á árinu, en við komum að því síðar. Í maí kom út fjórða smáskífan, Lemonade Lake frá Jaanh sem innihélt líka lagið The Only Thing. Einnig var þar að finna remix frá Birni Salvador og tyrkneska tónlistarmanninum Erdi Irmak sem hefur verið að gera það gott undanfarið í raftónlistarsenunni. Útgáfan hans Erdi náði til dæmis inn á top 100 á Beatport Deep House Hype listann og sat efst í sæti númer 61.
Sumarið gekk í garð og strákarnir héldu ótrauðir áfram. Í júní kom út fimmta smáskífan, If She með Birni Salvador sem einnig innihélt remix frá úkraínska tónlistarmanninum Nopi.
Í júlí kom út fyrsta safnplatan. Þar var að finna öll remixin sem hefðu verið gefin út hingað til ásamt tveim nýjum og áður óútgefnum remixum af laginu ‘Voyage’ frá belgíska tónlistarmanninum Greg Nairo og hinum íslenska Ohm. Í byrjun ágústmánaðar kom út sjötta smáskífan, You Are Your Dreams með hinum argentínska JFR. Þar var einnig að finna remix frá Jaanh, Birni Salvador og Leon S. Kemp. Upprunalega útgáfan eða original mixið af You Are Your Dreams komst hæst í sæti númer 64 á Beatport Deep House Hype listanum. Það er ansi fínn árangur að ná inn tvisvar á top 100 á fyrstu fimm mánuðunum. Í lok ágúst kom svo út sjöunda smáskífan, Açai frá MXV og Navin Larriba. Þar mátti einnig finna remix frá Jean Caillou og Birni Salvador. Útgáfan hans Björns fór í 19. sætið á Party Zone listann fyrir júlí og ágúst. Í október kom út Neptune in Pisces frá hinum argentínska Nicolas Navarro.
Í nóvember kom út níunda smáskífan, Sweet Sunrise on Meiling með argentínska tónlistarmanninum Cocho. Það má segja að Argentína hafi haft sterka tengingu við Nordic Voyage á árinu, en Cocho var fjórði argentínski tónlistarmaðurinn til að gefa út hjá útgáfunni árið 2020. Svo er vert að minnast á að þrír aðrir argentínskir tónlistarmenn eru staðfestir enn sem komið er fyrir árið 2021. Á smáskífunni hans Cocho var einnig að finna remix frá DJ Who og Birni Salvador. Útgáfan hans Björns sat í 24. sæti á desember lista Party Zone.
Síðasti mánuður ársins og líklegast á viðburðarríkasti gekk í garð og voru gefnar út tvær útgáfur. Tíunda smáskífan, Steiná með Birni Salvador og Middle Aged Dad kom út 7. desember og skaust alla leið upp í sæti númer 52 á Beatport Deep House Hype listanum. Þann 28 desember kom út breiðskífan ‘Legacy’ með Paul Hoffer. Þó að það séu einungis fáeinir dagar síðan Legacy kom út situr hún í sæti númer 24 á Top 100 Beatport Deep House Releases listanum.
Fyrstu fjórar útgáfurnar árið 2021 hafa verið staðfestar og verður spennandi að sjá hvernig málin munu þróast hjá Nordic Voyage á komandi vikum og mánuðum. Einnig sjá þeir Björn og Leon um vikulegan þátt á netútvarpsstöðinni TM-Radio. Þar fá þeir til sín gestaplötusnúða í hverjum þætti og fengu þeir til sín yfir 50 gesti á árinu. Þátturinn náði í efsta sætið á Mixcloud listunum nokkrum sinnum yfir árið.
