„Þetta hefur nú þegar fallið í mjög góðan jarðveg og gaman verður að sjá uppskeruna“

Tónlistarmaðurinn Sigtryggur Baldursson sem margir þekkja úr hljómsveitinni Sykurmolunum var útnefndur bæjarlistamaður Kópavogs í maí á síðasta ári en svo skemmtilega vildi til að verkefnin sem hann kaus að taka að sér fyrir hendur sem bæjarlistamaður, lenda flest inná árinu 2018.

„Mér skilst nú að það sé í lagi þar sem næsti bæjarlistamaður verður ekki tilnefndur fyrr en í maí næstkomandi. Má segja að fyrri hluti ársins hafir farið í undirbúning og sá seinni í framkvæmd.“ – Sigtryggur

Verkefni þessi eru í raun 2, en þau verða meðal annars kynnt á kvöldstund í salnum á safnanótt, 2. Febrúar, klukkan 21. þar sem Jón Ólafsson tekur á móti Sigtryggi í spjall og munu þeir spjalla um feril hans og taka lagið ásamt góðum gestum og tónlistarflutning. Dagskrá sú er ókeypis og öllum opin.

„Í fyrsta lagi langaði mig að búa til kynningu fyrir unglingastigið í Kársnesskóla, á möguleikum þess að búa til tónlist í spjaldtölvum þeim sem þau fengu í hendur á árinu 2016, en ekkert hefur verið boðið uppá kennslu í tónlistarforriti því sem fylgir með tölvunum, en það heitir Garage Band.“ – Sigtryggur

Hægt er að nota þetta forrit bæði til þess að semja og forrita tónlist en líka til þess að taka hana upp en mest öll hljóðritun á tónlist í dag fer fram í tölvum. Til þessa verks réði hann unga tónlistarmenn sem krakkar á unglingastigi þekkja og tengja við, en það eru þau Unnsteinn Manuel og Hildur Kristín, og voru þau með kynningu í Salnum í lok nóvember síðastliðinn. Í framhaldi af því verður boðið uppá sex vikna námskeið fyrir nemendur í Kársnesskóla sem val á vorönn, sem þau Unnsteinn og Hildur taka einnig að sér að sjá um. Þar fá nemendur að nota tölvur til þess að búa til tónlist, algerlega á eigin forsendum.

Á námskeiðinu býður Sigtryggur fram krafta sína til þess að tromma eða sjá um hverskonar slagverksleik inná upptökur þær sem nemendur eru að vinna með leiðbeinendum sínum. Síðan verður uppskeruhátíð á barnamenningardögum í lok apríl.

„Þetta hefur nú þegar fallið í mjög góðan jarðveg og gaman verður að sjá uppskeruna með vorinu því markmiðið er að kveikja á sem flestum og fjölbreyttustum perum í sambandi við nálgun á upplifun og framleiðslu tónlistar.“ – Sigtryggur

Svo þann 3. Febrúar kl 21:00 mun Sigtryggur setja upp tónlistargjörning með blandaðri tækni á sundlaugarnótt. Gjörningurinn fer fram á sundlaugarbakkanu í innilauginni og ber heitið Undir með vitund, en hann er unnin í samvinnu við raftónlistardúettinn ManKan, en það eru þeir fjöllistamennirnir Tómas Manoury og Guðmund Vigni Karlsson sem notast stundum við listamannsnafnið Kippi Kaninus.

„Í verkinu sem við sjóðum saman fyrir sundlaugarnótt notum við  risatrommur sem ég hef búið til úr gömlum endurvarpsloftnetum sem kallast Parabólur, en auk þeirra verður brúkaður búnaður þeirra ManKan manna sem þeir hafa sjálfir hannað og gerir þeim kleift að láta hverskyns elektróniska tónsköpun og trommutakta, stjórna myndvörpum sem skapa umgjörð um tónlistina svo úr verður heildarupplifun takts, tóna og myndverka sem skapa upplifun í sundlauginni sem við vonum að verði engu lík.“ – Sigtryggur

Þeir félagar notast við hátalarakerfi á sundlaugarbakkanum og neðansjávarhátalara sem verður settur ofaní laugina þannig að njóta má upplifunarinnar hvort sem er af bakka, í laug, eða í kafi.

Einnig koma fram dúettinn Between Mountains en þær unnu músiktilraunir á síðasta ári 2017. Between Mountains kemur frá Suðureyri Súgandafirði, og Núpi í Dýrafirði og samanstendur af þeim Kötlu Vigdísi og Ásrós Helgu. Hljómsveitin var stofnuð í byrjun mars til að taka þátt í Söngkeppni Samfés og í framhaldi Músíktilraunum. Katla semur lögin og textana fyrir hljómsveitina, hún spilar á hljómborð og syngur, Ásrós syngur í hljómsveitinni og spilar inn á milli á xylófón.

Dagskráin má svo sjá hér fyrir neðan:

2. febrúar – Safnanótt í Kópavogi, Salurinn kl. 21.

„Kvöldstund með Bæjarlistamanni.“ Jón Ólafsson fær til sín Sigtrygg Baldursson, bæjarlistamann Kópavogs í ár, og spjalla þeir um feril hans og taka lagið ásamt góðum gestum.

3. febrúar – Sundlaugarnótt í Sundlaug Kópavogs. frá kl 20 til kl. 22.

Zumba í lauginni

Between Mountains

Sigtryggur og ManKan – Undir með vitund.