Eins og alþjóð veit er goðsagnakennda rokksveitin Guns N Roses að koma til landsins til að halda tónleika á Laugardalsvelli 24 Júlí næstkomandi! Axl Rose, slash og félagar tóku rokkheiminn með trompi en ófáir slagarar hafa tröllriðið heimsbyggðinni svo árum skiptir! Sveitin á fjölmarga aðdáendur hér á landi lýkt og tók Albumm púlsinn á nokkrum þeirra!
Ómar Úlfur Eyþórsson útvarpsmaður á Xinu 977:
Hvenær heyrðir þú fyrst í Guns N Roses og risu hárin á hnakkanum?
Ég man fyrst eftir Guns N Roses á lepp sem var saumaður aftan á gallajakka vinar míns (mikið trend í late eighties). Myndin var af bannaða umslaginu af Appetite For Destrution og ég varð skíthræddur og allt sem að hræddi mann varð maður að tékka á. Ég man eftir að hafa séð Welcome To The Jungle vídeóið á MTV og þá varð maður hooked.
Hvað er það við Guns N Roses sem heillar þig og áttu þér uppáhalds lag með sveitinni?
Guns eru bara strangheiðarlegt rokk 101. Lookið, attitjúdið ímyndin og lögin. Þetta var allt svo töff og rokk á að vera töff. Patience af GnR Lies er alltaf í uppáhaldi en svo spilaði ég Estranged af Use Your Illusion II
Áttu þér einhverja skemmtilega minningu sem tengist sveitinni og hvaða plata er í uppáhaldi?
Besta minningin tengd sveitinni er síðan um jólin. Þá opnaði ég pakkann frá ástkærri eiginkonu minni. Inni í pakkanum voru miðar á Guns í Berlín 3. Júní næstkomandi. Fyrstu tónleikarnir á Evróputúrnum og verður væntanlega sturlað
Nú er sveitin að heimsækja klakann, þú eflaust ætlar á tónleikana! við hverju má búast á stærstu tónleikum Íslandssögunnar?
Ég verð í sumarfríi erlendis þegar að Guns koma! Gaman að komast út í frí en alveg agalegt að missa af þeim hér heima. Þetta verða einhverjir mögnuðustu tónleikar íslandssögunnar held ég svei mér þá. Það verður rosaleg mæting og sveitin nær svo breiðum hóp. Lyngdu aftur augunum og ímyndaðu þér Sweet Child O´Mine riffið, á tónleikum, í góðra vina hópi, í íslensku miðnætursólinni.
Ágúst Aðalsteinsson Tambórínu leikari og lífskúnstner:
Hvenær heyrðir þú fyrst í Guns N Roses og risu hárin á hnakkanum?
Ætli það hafi ekki verið 1987 eða 1988. Sá Paradise City myndbandið á Rúv og fór daginn eftir út í plötubúð og náði mér í Appetite For Destruction og varð að manni!
Hvað er það við Guns N Roses sem heillar þig og áttu þér uppáhalds lag með sveitinni?
Það er bara þetta pjúra rokk og ról og geggjuð lög. En það er ekki séns að ég geti nefnt eitthvað uppáhalds.
Áttu þér einhverja skemmtilega minningu sem tengist sveitinni og hvaða plata er í uppáhaldi?
Öll unglingárin eru lituð af Guns N Roses! Ég held að Appetite For Destruction verði alltaf í uppáhaldi.
Nú er sveitin að heimsækja klakann, þú eflaust ætlar á tónleikana! við hverju má búast á stærstu tónleikum Íslandssögunnar?
Já það kæmi ekki til greina að Guns væru á Íslandi og ég væri ekki þar. Ég fór á þá í Köben síðasta sumar þannig að ég veit að þetta verður rosalegt!
Birgir Stefánsson tónlistarmaður:
Hvenær heyrðir þú fyrst í Guns N Roses og risu hárin á hnakkanum?
Ætli ég hafi ekki verið unglingur, kannski 12-13 ára þegar ég man fyrst eftir að hafa hlustað á Guns N Roses. Ég var virkilega hrifinn af þeim, var mikill rokkmaður á þeim tíma.
Hvað er það við Guns N Roses sem heillar þig og áttu þér uppáhalds lag með sveitinni?
Það sem ég fílaði mest við bandið á sínum tíma voru gítar stefin þeirra sem eru flest mjög sérkennileg og eftirminnileg, ætli uppáhalds lagið mitt með þeim sé ekki “Sweet Child O’ Mine” eða “Paradise City”.
Áttu þér einhverja skemmtilega minningu sem tengist sveitinni og hvaða plata er í uppáhaldi?
Ég á mér vissulega uppáhalds plötu en það er erfitt fyrir mig að velja eina, ég ætla þó að segja “Appetite for Destruction”.
Nú er sveitin að heimsækja klakann, þú eflaust ætlar á tónleikana! við hverju má búast á stærstu tónleikum Íslandssögunnar?
Ég fer á tónleikana og ég geri ráð fyrir mögnuðu kvöldi. Mér heyrist á öllu að það verði þarna eitt stærsta svið sem hefur verið flutt inn til landsins, og ég verð fyrir vonbrigðum ef þetta verða ekki ,,greatest hits” tónleikar.
