Söfnun hljómsveitarinnar KIG & HUSK á Karolina Fund fyrir vínylútgáfu á fyrstu hljómplötu sveitarinnar Kill the Moon lýkur í dag, föstudag. Kraftur komst í söfnunina í gær þegar fjárfestir hét að greiða 350 Evrur fyrir NFT af demó-lagi plötunnar.
Þetta ku vera í fyrsta sinn á Íslandi sem NFT viðskipti á íslenskri tónlist fer fram. NFT eða Non-Fungible Token er stafrænt hlutdeildarskírteini eða afsal sem með hjálp bálkakeðjutækni (block chain) tryggir uppruna á einstöku stafrænu listaverki eða vöru sem gengið getur kaupum og sölum.
Kill the Moon kom út um mitt síðasta ár (2021) og fékk um leið frábærar viðtökur tónlistargagnrýnenda auk þess sem hún hlaut tilnefningu til Íslensku Tónlistarverðlaunanna sem besta plata ársins 2021. Platan hefur hingað til aðeins verið aðgengileg á streymisveitum (Spotify, Tidal, Bandcamp) en nú stendur til að framleiða 200+ vínyl plötur með aðstoð Karolina Fund.
Tónlist KIG & HUSK hefur verið lýst sem poppuðu art-rokki þar sem hefðbundið tónlistarform er þanið út og óhljóðum stillt upp á móti melódískum lag- og sönglínum. Hljóðfæraleikur, söngur, forritun, útsetningar og hljóðblöndun er í höndum KIG & HUSK en eftirtaldir hljóðfæraleikarar lögðu einnig hönd á plóg: Kjartan Guðnason (trommur), Paul Maguire (trommur), Hallgrímur Jón Hallgrímsson (trommur), Óttar Sæmundsen (bassi), Pétur Ben (gítar).
KIG & HUSK skipa þá Frank Hall og Höskuld Ólafsson og hafa þeir félagar komið víða við á sínum glæsta ferli. Frank nam tón- og myndlist við The Royal Conservatory og The Royal Academy í Hollandi og útskrifaðist þaðan með MA gráðu árið 2006. Frank hefur samið tónlist við fimm kvikmyndir, Svartur á leik, Julia, Afinn, Ég man þig og Albanian Gangster. Hann hlaut tilnefningu til Eddunnar fyrir Svartur á leik og hlaut einnig verðlaun fyrir bestu frumsömdu tónlist fyrir Julia á kvikmyndahátíðinni Screamfest í Los Angeles. Hann var einnig tilnefndur fyrir tónlist ársins í Leikhús- og kvikmyndatónlist á Íslensku tónlistarverðlaununum árið 2018 fyrir tónlistina við kvikmyndina Ég man þig. Frank er meðlimur í hljómsveitunum Skárren ekkert og Ske og þær sveitir hafa gefið út talsvert af tónlist. Frank hefur einnig unnið tónlist og hljóðmynd fyrir fjölda leiksýninga, hvort sem er einn sín liðs eða í samstarfi við aðra.
Höskuldur hefur starfað með hinum ýmsu hljómsveitum, komið að leiksýningum og kvikmyndum og gefið út hljómplötur með bæði Ske og Quarashi þ.á.m. hjá Sony Columbia Records árið 2002 (Quarashi) sem var dreift af EMI Publishing um allan heim. Platan seldist í fleiri en 500.000 eintökum og hljómsveitin kom fram á tónleikum og tónleikahátíðum í N-Ameríku, Evrópu, Japan og Ástralíu. Höskuldur Ólafsson lauk prófi í íslensku- og bókmenntafræði frá Háskóla Íslands árið 2004 og nokkrum árum síðar meistaraprófi í listspeki frá University of East Anglia (UEA) í Englandi, auk rannsóknar-meistaragráðu í heimspeki frá sama háskóla ári síðar.
Hægt er að veita verkefninu lið á ýmsa vegu. Eins og t.d að styrkja um 35 evrur og alveg upp í 840 evrur, og þar af leiðandi fær viðkomandi ýmislegt í staðin eins og t.d. áritaðar vínylplötur, persónuleg kveðja/kort og 30 mín einkatónleika svo fátt sé nefnt. Kíktu á Karolina Fund og veittu þessari flottu söfnun lið sem lýkur í dag.
Smelltu HÉR til að leggja þessu flotta verkefni lið.
Umræðan