Tómas Welding er tvítugur hafnfirðingur sem sendi nýlega frá sér lagið Sideways. Þrátt fyrir að vera á miklu flugi í tónlistinni hefur áhugi hans ávallt legið í kvikmyndagerð. „Ég hef alltaf haft mikinn áhuga á kvikmyndagerð og allt sem viðkemur henni, sérstaklega þá kvikmyndatöku og leikstjórn – en tónlistaráhuginn hefur einni alltaf verið til staðar. Ég þori bara fyrst núna að kýla á það að gefa út og syngja fyrir framan annað fólk. So far, so good.“
Um tilurð lagsins segir Tómas að kvöld eitt þegar hann kom seint heim hafi hann skellt takti í eyrun og ýtt á upptöku og þannig hafi Sideways orðið til. „Textalega séð „meikar það ekki beinlínis sens“ því það er allt saman spunnið á staðnum, í þeim þriggja mínútna ramma sem lagið er.“
Litla systir Tómasar, Tobba (Þorgerður Katrín), á hlut í því en Tómas segist hafa fengið hana til liðs við sig til að ljá laginu fjölbreytileika. Þess má annars geta að margt spennndi er á döfinni hjá Tómasi. Hann er langt kominn með sína fyrstu plötu og þar kemur rapparinn vinsæli, JóiPé, ansi mikið við sögu.
