Á föstudaginn sem leið, fjórða júní, sendir kvartettinn Amiina frá sér sitt fyrsta lag í fimm ár, en það er lagið Beacon, sem verður að finna á væntanlegri þröngskífu sveitarinnar, Pharology, sem kemur út 26. Júní.
Kvikmyndalistamaðurinn Heimir Freyr Hlöðverson gerði myndbandið við lagið Beacon en Heimir gerði myndbandsverk við Pharology í heild og er Beacon hluti af því verki. Pharology er fyrsta útgáfa amiina í hartnær fimm ár og hefur verið beðið af mikilli eftirvæntingu. Lögin á Pharology má rekja aftur til ársins 2019 þegar amiina var fengin til þess að taka þátt í tvíæringi í Danmörku þar sem sveitin gerði innsetningu í vita í Gilleleje, litlu þorpi í Danmörku. Titill plötunnar, Pharology, myndi því útleggjast sem „vitafræði“. Titlar laganna þriggja á plötunni vísa allir í þessi vitafræði. Myndbandsverki Heimis Freys við Pharology mætti lýsa sem nokkurs konar kvikmyndaljóði við plötuna og allt kapp lagt á að gera sjónrænum þáttum og hljóðgæðum hátt undir höfði í Bíó Paradís og mega gestir búa sig undir mikið sjónarspil.
Hljómsveitin amiina var stofnuð seint á síðustu öld og þá sem strengjakvartett skipuð þeim Hildi Ársælsdóttur, Eddu Rún Ólafsdóttur, Maríu Huld Markan Sigfúsdóttur og Sólrúnu Sumarliðadóttur. Sveitin gat sér fljótt gott orð fyrir mikla spunahæfileika og margslungnar útsetningar og starfaði með fjölda listamanna, ma. Jóhanni Jóhannssyni, Yann Tiersen, Efterklang, Spiritualized, og Sigur Rós svo einhverjir séu nefndir. Árið 2009 áskotnaðist sveitinni liðsauki tveggja nýrra meðlima, slagverksundrabarnsins Magnúsar Trygvasonar Eliassen og tilraunaraftónlistarmannsins Guðmundar Vignis Karlssonar (aka Kippi Kaninus); árið 2013 sögðu Edda og Hildur skilið við sveitina sem þá varð kvartett enn á ný.
amiina er þverfaglegur listahópur. Þau hafa farið á hljómleikaferðir vítt og breitt um heiminn, sent frá sér þrjár þröngskífur, fjórar smáskífur og þrjár breiðskífur í fullri lengd; „Kurr“ (2007), „Puzzle“ (2009), og „Fantomas“ (2016). Útgáfur amiina hafa brúað bil milli ólíkra listforma, tónlistar, kvikmynda, leikhúss, dans- og myndlistar. Í aðdraganda útgáfu „Pharology“ gera amiina sig klár til að láta ljós sitt skína enn á ný. Útgáfunni verður fylgt eftir með vorinu og fram á sumar.
amiina skipa:
Núverandi meðlimir: Maria Huld Markan Sigfúsdóttir, Sólrún Sumarliðadóttir, Magnús Trygvason Eliassen, Guðmundur Vignir Karlsson (aka Kippi Kaninus). Fyrrum meðlimir: Hildur Ársælsdóttir, Edda Rún Ólafsdóttir.
Umræðan