VEIT EKKI HVORT ÉG KOMIST YFIR ALLT SEM ER Í HAUSNUM Á MÉR

0

Tónlistarmaðurinn Birkir Kristján Guðmundsson eða Bróðir Big eins og hann kallar sig var að senda frá sér glænýtt lag sem ber heitið „Á ferð og flugi.” BófaTófa kemur einnig fyrir í laginu en það er tekið af væntanlegri plötu kappans sem kemur út á næstunni!

Birkir kallar tónlist sína hreinræktaða „boom bap Hip-Hop“ en sú tónlistarstefna var allsráðandi á tíunda áratugnum! Albumm.is náði tali af Kristjáni og svaraði hann nokkrum spurningum.


Hvernig mundir þú lýsa þinni tónlist og hvaðan færðu innblástur fyrir þína tónlistarsköpun?

Ég myndi bara kalla þetta hreinræktað klassískt „boom bap Hip-Hop.“ Margir myndu kannski kalla þetta gamaldags Hip-hop en það hugtak hefur allt aðra merkingu fyrir mér. Innblásturinn myndi ég segja að komi úr öllum áttum. Öll tónlist sem ég hef nokkurn tímann hlustað á hefur myndað minn tónlistarsmekk og ég reyni bara að gera það sem ég fíla. Yfirleitt þegar ég fæ nýjan takt sendan frá þeim ótalmörgu pródúserum sem ég vinn með þá leyfi ég beatinu að rúlla þangað til ég finn hvað væri eðlilegt yrkisefni og á hvaða hátt væri best að koma því frá mér svo það má segja að helsti innblásturinn komi frá þeim.

Hver er uppáhalds rapplatan þín og afhverju hún?

Nánast ómögulegt að velja bara eina. Þessa stundina er The Infamous með Mobb Deep spiluð nánast daglega (RIP Prodigy) en ef það er ein plata sem stendur uppúr er það Realms ´N Reality með Cella Dwellas. Það var ein allra fyrsta Hip-Hop plata sem ég heyrði og örugglega sú sem ég hef hlustað á oftast. Mjög þakklátur Aroni frænda að hafa skrifað hana á geisladisk fyrir mig þegar ég var svona 8 ára. Rúmum 15 árum seinna var ég svo að róta í vinyl safninu hans Seppa og fann hana á vaxi og fékk að kaupa hana rétt áður en hann seldi allt safnið sitt. Bestu kaup sem ég hef gert. Það vita það allir sem hafa heyrt að þetta er svakaleg plata. Ekta 90´s underground Hip-Hop sem sækir innblásturinn sinn bæði í gangsterisma og Dungeons and Dragons borðspilið. Taktarnir frá Nick Wiz eru líka svo fáránlega góðir. Það er nafn sem mér finnst að mun fleiri ættu að þekkja.

Nú er plata væntanleg frá þér, er hún búin að vera lengi í vinnslu og geturu lýst henni í fimm orðum?

Það fer eftir því hvernig maður lítur á það. Sumir textarnir á plötunni eru eldgamlir. Eitt vers þarna er blanda af tveimur versum sem ég skrifaði árið 2009 eða 2010 en mest af þessu er skrifað 2014-2015 þegar ég ákvað að fara að skrifa rapptexta aftur eftir nokkurra ára pásu. Ég byrjaði svo að taka upp plötuna fyrir svona ári. Ég lauk öllum upptökum fyrir árslok 2016 og síðan þá hefur hún verið í höndunum á Grandmaster BRR sem setti þetta allt saman og hljóðblandaði. Hann býr í Danmörku svo þetta tók kannski örlítið lengri tíma heldur en ef við hefðum geta tekið proper sessions saman. En þetta tókst á endanum eftir fáránlega mikið af tölvupósts skrifum og facebook spjalli. 5 orð = fjölbreytt, fýsileg, fróðleg, framandi og fersk.

Hvað er framundan hjá þér og eitthvað að lokum?

Of margt framundan, veit ekki hvort ég hreinlega komist yfir að framkvæma allt það sem er í gangi í hausnum á mér. En ég er strax byrjaður að vinna í tveimur plötum með sitthvorum pródúsernum. Ein með BRR og ein með Earmax. Við í hljómsveitinni HÁSTÖFUM eru líka komnir með einhver 5-6 lög ready og stefnum á breiðskífu. Ég og BófaTófan höfum líka verið að ræða að gera EP saman. Svo auðvitað bara Hrátt Hljóð vol. 2 Að lokum myndi ég vilja benda fólki á að fylgjast með Bróðir BIG á facebook. Síðasti síngúllinn kemur út á næstu dögum, platan öll á að lenda á Spotify 19. júlí og 27. júlí verða útgáfutónleikar á Prikinu þar sem ég kem fram ásamt öllum gestaröppurunum á plötunni. Platan verður svo aðgengileg á CD og Vinyl fyrir áhugasama.

Skrifaðu ummæli