Tónlistarmaðurinn Franz Gunnarsson hefur svo sannarlega komið víða við á viðburðarríkum ferli en hann var að senda frá sér plötu undir nafninu Paunkholm. Franz hefur slegið strengi með ófáum hljómsveitum en hann gerði garðinn frægann með sveitum eins og Ensími og Dr. Spock svo fátt sé nefnt. Franz átti mikið af uppsöfnuðu efni sem ekki endilega passaði í þær sveitir sem hann er í og úr varð Paunkholm. Kaflaskil heitir platan og óhætt er að segja að hún er einkar frábær í alla staði enda ekki annað hægt þegar slíkur tónlistarmaður á í hlut! Albumm.is náði tali af kappanum og svaraði hann nokkrum skemmtilegum spurningum!
Þú varst að senda frá þér plötu undir nafninu Paunkholm. Er þessi hugmynd búin að lifa lengi í maganum?
Ég hef verið að semja tónlist í fjöldamörg ár þannig að það hefur safnast upp mikið af efni og fullt sem passar ekki endilega fyrir þær hljómsveitir sem ég er í. Það hefur alltaf verið á dagskrá að koma þessu efni frá mér svona svipað eins og að losa harðan disk til að búa til pláss fyrir nýjar hugmyndir en sóló plata var aldrei á teikniborðinu fyrr en nýlega. Mig langaði ekki að gefa út undir mínu nafni þannig að karakterinn Paunkholm varð fyrir valinu.
Var platan lengi í vinnslu og hvernig myndir þú lýsa tónlistinni?
Sum lögin voru samin á síðustu öld en sjálf vinnslan á plötunni tók ekki langan tíma. Ég vildi hafa flutninginn frekar lifandi þannig að ekki var legið yfir upptökunum. Hljóðfæraleikarar og flytjendur voru að spila og syngja eina til tvær tökur fyrir hvert lag að meðaltali og t.d. töldum við Kiddi trommari í einn grunn án þess að einu sinni ræða hvernig lagið ætti að vera spilað. Bara talið í og spilað inn í einni töku og leyft tilfinningunni að ráða ferðinni. Tónlistin er eins og ég sagði áður ekkert í líkingu við þær hljómsveitir sem ég er í og mætti lýsa henni best sem melódísku poppi.
Þú hefur komið víða við í tónlistinni, er Paunkholm eitthvað frábrugðinn fyrri verkum og ef svo er hvernig þá?
Ætli þetta sé ekki það persónulegasta sem ég hef gert hingað til. Ég hætti að drekka fyrir rúmum tveim árum og þetta er fyrsta platan sem ég vinn án þess að vera undir áhrifum í vinnsluferlinu. Platan er einskonar uppgjör við fortíðina og vinnslan var algjör æfing fyrir mig að vinna edrú í hljóðverinu. Platan er líka frábrugðin fyrri verkum að því leyti að flest listafólkið sem kemur fram á plötunni hef ég ekki unnið með í hljóðveri áður heldur aðeins á sviði.
Hver er munurinn á að semja einn og að vera í hljómsveit og er þetta allt samið af þér?
Ég sem öll lögin og alla texta nema einn. Munurinn að gera þetta einn er að ég stend og fell með þessu. Ef fólki finnst þetta ömurlegt þá get ég bara sparkað í rassinn á sjálfum mér. Allar ákvörðunartökur enda alltaf hjá mér og því er það mjög frábrugðið en að vinna með hljómsveitunum mínum þar sem ríkir lýðræði. Ég reyndar leyfði þátttakendum á plötunni að hafa rödd í ferlinu og tók mark á gagnrýni og þá aðallega frá Einari Vilberg upptökumanni í Hljóðverk sem vann plötuna með mér og á alveg fullt í henni.
Á að fylgja plötunni eftir með tónleikahaldi og hvar er hægt að nálgast plötuna?
Það er hægt að nálgast plötuna stafrænt á öllum helstu netveitum eins og t.d. Spotify, tonlist.is, cdbaby o.s.frv. Vínyl útgáfa kemur á markað í apríl – maí og þegar hún kemur ætlar Paunkholm að halda útgáfutónleika með helst öllum þeim frábæra listafólki sem tóku þátt í plötunni. Paunkholm mun líklegast ekki spila mikið þannig að ég mæli með að fólk mæti á þær framkomur sem bjóðast.
Eitthvað að lokum?
Ég hvet alla til að hlusta á plötuna og ef þér líkar hún þá endilega verslaðu hana þar sem ég er að borga þetta ævintýri úr eigin vasa og þætti vænt um að koma út á núllinu. Þú mátt líka kíkja á Facebook síðu Paunkholm og splæsa í læk. Svo mun heimasíðan Paunkholm.is opna á næstunni.
Umræðan