SUMARMÖLIN HALDIN Í FJÓRÐA SINN 11. JÚNÍ

0

sumar

Tónlistarhátíðin Sumarmölin á Drangsnesi fer fram í fjórða sinn þann 11. júní næstkomandi. Á hátíðinni skapast jafnan mögnuð stemning þar sem fólk á öllum aldri kemur saman til að njóta tónlistarflutnings margra af fremstu listamanna þjóðarinnar í einstöku umhverfi. Sumarmölin fer venju samkvæmt fram í Samkomuhúsinu Baldri á Drangsnesi.

drangsnes ragna

Drangsnes

Í ár koma fram:

FM Belfast
Hjaltalín
Karó
Kippi Kaninus
Rúna Esra
Snorri Helgason
Úlfur Úlfur

Eftir tónleikana mun hinn geðþekkti DJ Hermigervill svo þeyta skífum á Malarkaffi fyrir þá sem hafa ekki fengið nóg af tónlist og stuði.

Sú nýbreytni verður á Sumarmölinni í ár að boðið verður upp á dagskrá á föstudagskvöldinu þar sem uppistandararnir Saga Garðarsdóttir og Hugleikur Dagsson munu troða upp á Malarkaffi.

Miðaverð er 5.900 kr og ókeypis verður fyrir 12 ára og yngri.

Einnig er hægt að kaupa tvo miða og gistingu fyrir tvo á Malarhorni á tónleikadag á 25.900 kr. Miðasala fer fram á tix.is.

Athugið að 18 ára aldurstakmark er á viðburðinn en yngri gestir eru sérstaklega velkomnir í fylgd fullorðinna.
Sumarmölin er haldin í samstarfi við Rás 2, Ölgerðarina og Malarhorn og nýtur stuðnings Uppbyggingarsjóðs Vestfjarða, Tónlistarsjóðs, Sparisjóðs Strandamanna og Kaldrananeshrepps.

Comments are closed.