Stelpur Rokka og Synth Babes sameina krafta sína og blása til feminískrar tækni og tónlistarhátíðar

0

Synth Babes, alþjóðlegt samstarfsnet og frumkvöðlafyrirtæki kvenna, trans og kynsegin fólks í raftónlist, kemur til Íslands í sumar til að halda fyrstu Synth Babes Fest hátíðina, í samstarfi við félagasamtökin Stelpur rokka! Sjálfboðaliðarekin samtök sem starfa af femínískri hugsjón við að efla ungar stelpur og trans krakka í gegnum tónlistarsköpun.

Um heila helgi munu tónlist, femínismi og tækni renna saman við nýsköpun og innblástur. Hátíðin er einnig liður í svokölluðum Pepp-viðburðum, sem Stelpur rokka! hafa staðið að síðastliðinn vetur í samstarfi við Loft í Bankastræti.

Fjölbreytt íslenskt og erlent tónlistarfólk mun stíga á svið, spila og segja frá græjunum sínum. Einnig verður boðið upp á vinnusmiðjur fyrir allan aldur í tónlistarforritum á borð við Ableton Live undir leiðsögn raftónlistarkvenna, hljóðtilraunastofu þar sem hægt verður að prófa nýjustu tækni í tónlistarsköpun og flutningi, ásamt pallborðsumræðum um tónlist, tækni og jafnrétti. Nánari dagskrá verður kynnt innan skamms.

Til að geta gert hátíðina sem veglegasta standa Synth Babes að hópfjármögnuninni #SYNTHBABESUNITE í gegnum Pozible, sem hrint var af stað 10. maí síðastliðinn. Þar er m.a. hægt að verða sér úti um tónlistarforritin Ableton Live og Reason á góðum afslætti, ásamt listaverkum, sérsmíðuðum raftónverkum og ýmsum öðrum varningi. Síðast en ekki síst er hægt að bóka sérstaka Synth Babes stofutónleika í Reykjavík! Sjá nánar hér.

„Ég tók þátt í vinnusmiðju á vegum Synth Babes í Malmö, Svíþjóð, í byrjun árs, og langaði að verða hluti af þessu samstarfsneti. Ég tók þátt í stofnun Stelpur rokka! á Íslandi árið 2012 og hef starfað sem verkefnastýra þar síðustu 6 ár. Í sumar ætlum við í fyrsta skipti að bjóða upp á raftónlistarlínu í 13-16 ára rokkbúðunum, en ásamt sjálfboðaliðum Stelpur rokka! ætla Synth Babes tónlistarkonurnar Ninoosh og Loljud að leiðbeina á raftónlistarlínunni. Við ákváðum svo að taka þetta skrefinu lengra og skella í tónlistar- og tæknihátíð í leiðinni!” – Auður Viðarsdóttir, tónlistarkona og verkefnastýra hjá Synth Babes

Synth Babes Fest fer fram helgina 30. júní – 1. júlí á Loft í Bankastræti. Frítt er inn, öll velkomin og aðgengi fyrir fólk með hreyfihömlun er gott.

„Ég stofnaði Synth Babes (sem áðu hét Synth Babe Records) árið 2016. Hingað til höfum við starfað sem sjálfstæð plötuútgáfa, en nú langar mig virkilega að Synth Babes láti til sín taka sem alþjóðleg hreyfing sem stuðlar markvisst að breytingum í tónlistar- og tæknibransanum.” – Anya Trybala

Nýleg rannsókn á vegum femíníska raftónlistarnetsins female:pressure leiddi í ljós að á 122 raftónlistarhátíðum í 32 löndum voru tæplega 20% tónlistaratriðanna með kvenkyns tónlistarfólk innanborðs. Meistararannsókn Auðar Viðarsdóttur á upplifun tónlistarkvenna af tækni sýndi jafnframt fram á að kvenkyns tónlistarmenn og pródúsenta skortir umfram allt sýnilegar fyrirmyndir og aðgengileg rými þar sem þær geta prófað sig áfram með tæki og tól og þróað hæfileika sína á eigin forsendum.

„Okkur langar að kanna ólíkar leiðir til að stuðla að kynjajafnvægi og nálgast þetta markmið á breiðum grunni, t.d. með því að gera tónlistarforrit og græjur aðgengilegri fjárhagslega, taka þátt í tónlistarlegri nýsköpun á sviði VR / AR tækni og nýta nýjustu tækni í dreifingu stafræns efnis í þágu tónlistarfólks sem er í minnihluta í tónlistar- og tæknibransanum. Og síðast en ekki síst langar okkur að vera lifandi samstarfsnet og lyftistöng fyrir upprennandi tónlistarfólk, og standa að spennandi viðburðum eins og Synth Babes Fest um allan heim.” – Anya Trybala

Synth Babes samstarfsnetið nær nú allt frá Ástralíu til Mexíkó og Íslands, en kjarnastarfsemin fer fram í Malmö í Svíþjóð.

Skrifaðu ummæli