Ljósmyndarinn Aníta Eldjárn hefur vakið verðskuldaða athygli með myndum sínum að undanförnu enda ekki furða þar sem þær eru afar glæsilegar! Aníta byrjaði að taka myndir árið 2007 en á þeim tíma stalst hún mikið í myndavél föður síns. Aníta lýsir sínum stíl sem frekar hráum og real en henni finnst skemmtilegast að taka myndir á tónlistarhátíðum, af fólki og menningu. Albumm.is náði tali af Anítu og svaraði hún nokkrum skemmtilegum spurningum!
Hvenær byrjaðir þú að ljósmynda og hvernig fékkstu áhuga fyrir því?
Ég byrjaði að ljósmynda á síðasta árinu mínu í menntaskóla 2007. Pabbi minn keypti sér canon 400d myndavél og ég stalst mikið í hana. Ég fékk svo vinkonur mínar til að sitja fyrir og æfði mig. Brátt varð ég heltekin og endaði á að fá myndavélina í útskriftargjöf sem var mikil gleðistund!
Hvernig ljósmyndir finnst þér skemmtilegast að taka og hvernig myndir þú lýsa þínum stíl?
Ég hef mikinn áhuga á tísku, tónlist og menningu. Mér finnst skemmtilegast að mynda á tónlistarhátíðum. Þar er samblanda af þessu öllu. Ég hef alltaf verið mjög mikil félagsvera og elska að vera í kringum mikið af fólki og mikið líf. Ég myndi lýsa mínum stíl sem frekar hráum og real.
Hvaðan færðu innblástur og hverjir eru þínir helstu áhrifavaldar?
ÚFF erfið spurning. Ætli ég fái ekki innblástur úr umhverfinu, náttúrunni, sjónvarpi, tísku og allt þar á milli. Mínir helstu áhrifavaldar eru líklegast foreldrar mínir. Ég er alin upp á fallegu heimili þar sem var keypt mikil list, skúlptúrar og málverk og mikið pælt og spekulerað. Einnig hafði einn af kennurunum mínum í fotofagskolen mikil áhrif á mig og ég hef hans ráð ávallt bakvið eyrað.
Hvernig græjur notar þú þegar þú tekur ljósmyndir?
Ég nota canon 5dmark 2 og 35mm linsu. Ég á tvö flöss, 270 ex og 580 ex. Nota þau til skiptis. En ég er hrifin af hráum point and shoot stíl og notast því mikið við flöss.
Besti ljósmyndari allra tíma að þínu mati?
Þeir eru svo margir. En mér finnst þeir sem segja sögu með myndunum sínum heilla mig mest. Til dæmis Rax. Ég get hjorft á ljósmynd eftir hann tímunum saman og pælt í sögunni á bakvið. Edward Weston er líka einn af mínum uppáhalds.
Hvað er framundan hjá þér og eitthvað að lokum?
Eins og er er ég í námi í Kaupmannahöfn og tek einhver ljómsyndavekefni þegar tími gefst en skólinn gengur fyrir. Ég hef verið að vinna að skemmtilegu verkefni fyrir strætó sem ég ætla að halda áfram með og svo verður sumarið troðfullt af tónlistarhátíðum og gleði. Mig langar líka alltaf að vera duglegri að gera mín persónulegu ljósmynda verkefni og er með nokkrar hugmyndir í hausnum en þarf bara að koma þeim í verk!
Hægt er að fylgjast nánar með Anítu Eldjárn hér:
Umræðan