SALSAKOMMÚNAN BLÆS TIL ÁRAMÓTADANSLEIKS Í IÐNÓ

0

Salsakommúnan blæs til áramótadansleiks í Iðnó laugardagskvöldið 6. janúar kl. 20.00 Á tónleikunum mun sveitin leika lög af sinni fyrstu breiðskífu, í bland við þekkta salsaslagara, flutta í áður óheyrðum útgáfum við nýja íslenska texta.

Sveitin er skipuð þrautþjálfuðu tónlistarfólki úr framvarðarlínu íslensks popptónlistarlífs og er þekkt fyrir að slá á létta strengi og skemmta gestum með fleiru en bara suðrænum tónum. Salsakommúnan teflir fram fullskipaðri stórsveit og verður Iðnó full af suðrænni sveiflu þetta kvöldið.

Áður en sveitin stígur á svið verður boðið upp á salsadanskennslu frá Salsa Iceland og eru áhugasamir hvattir til að mæta snemma til þess að liðka mjaðmirnar og læra sporin.

Salsakommúnan er hljómsveit sem leikur kröftuga, dansvæna tónlist undir áhrifum frá tónlistarhefðum Suður-Ameríku. Stofnun sveitarinnar átti sér langan aðdraganda en var almennilega hrint í af stað haustið 2016. Síðan þá hefur hún gefið út smáskífur, leikið á tónleikum og mun á næsta ári gefa út sína fyrstu breiðskífu. Allir textar sveitarinnar eru frumsamdir og á íslensku sem færir tónlist af þessu tagi nær íslenskum áheyrendum. Um leið eru textasmíðarnar undir áhrifum töfraraunsæisins, sem einkennir bókmenntir Suður-Ameríku, í bland við íslenskan veruleika og er með þessu móti leitast við að etja saman þessum ólíku menningarheimum á nýstárlegan hátt.

Hægt er að nálgast miða á tónleikana á Tix.is

Skrifaðu ummæli