„NÁTTÚRAN ER MINN HELSTI ÁHRIFAVALDUR“

0

Bjarni Rafn Kjartansson / Muted.

Í dag kemur út á vegum Möller Records  platan Wizard is Nice með tónlistarmanninum Muted. Wizard is Nice er tuttugu laga plata, framhald plötunnar Lizard on Ice sem kom út árið 2014.  Muted er þekktur fyrir einstakan hljóðheim, frumlega hljóðsmölun og töfrandi takta og hæfileikar hans eru svo sannarlega að njóta sín á þessari plötu.

Bjarni Rafn Kjartansson er maðurinn á bak við Muted en hann hefur fengist við raftónlist af ýmsu tagi og gefið út fjölmargar plötur frá því hann kom fyrst fram á sjónarsviðið fyrir tæpum áratug. Tónlist Muted má lýsa sem bræðing af down-tempo, triphop undir áhrifum af jazz, hip-hop og raftónlist. Plötuna er hægt að nálgast á vef Möller Records.

Plötuumslag Wizard Is Nice.

Albumm.is náði tali af Bjarna og svaraði hann nokkrum skemmtilegum spurningum um plötuna.

Er platan búin að vera lengi í vinnslu og hvernig mundir þú lýsa plötunni í þremur orðum?

Platan var sett saman á nokkrum vikum í lok árs 2016. Hún er samansafn af beats sem sum hver eru mjög gömul, allavega á mínum playlista, það elsta er frá 2012 og það nýjasta er frá 2016. Í þremur orðum myndi ég lýsa henni sem „tilraunakenndu takt ferðalagi.“

Er platan eitthvað frábrugðin fyrri verkum, ef svo er hvernig þá?

Ég er náttúrulega með fingurna í allskonar verkefnum. Myndi ekki segja að þetta „sound“ sé mitt aðal sound. Þessi plata samsvarar fyrstu vínyl útgáfunni sem ég gaf út sjálfur, „Lizard on Ice,“ en hún kom út árið 2013. Ég hef alltaf haft mikinn áhuga á hip hopi og eftir að ég hafði verið að gera músík í nokkur ár fór mig að langa að prófa að gera mín eigin beats og „Lizard on Ice“ var þannig fyrsta hip hop tónlistin sem ég gerði og „Wizard is Nice“ rökrétt framhald af þeim tilraunum. Ég tek hip hopið sem ég geri sjálfur ekkert of alvarlega þar sem í mínum huga er þetta meira til gamans gert og til að mynda spila ég þessi lög eiginlega aldrei þegar ég spila á tónleikum.

Hvernig semur þú þína tónlist og hvaða græjur ertu helst að nota?

Fyrir trommurnar mínar nota ég mestmegnis sömpl og Zoom H4n upptökugræju sem ég nota til þess að bæta allskonar náttúrulegum hljóðum inn í taktana. Fyrir hljóðheiminn er ég núna að nota Oberheim Matrix 1000 en einnig má heyra í Novation Supernova II, Waldorf Blofeld og Yamaha DX7 á plötunni. Fyrir bassa og lægri tíðnir er ég með Moog Little Phatty syntha sem er í mjög miklu uppáhaldi hjá mér og notast svo við Moog MF104M delay og aðra litla effecta sem ég bæti stundum við til að krydda uppá soundið.

Ég notast við Propellerheads Reason 5 forritið og vinnuferlið mitt virkar þannig að ég byrja á því að gera takt og fer síðan yfir á synthana og spila fullt af hugmyndum sem koma með taktinum og í leiðinni tek ég það sem ég spila upp með forriti sem heitir Sony Sound Forge 10. Síðan klippi ég hljóðin niður í sömpl og bæti inn í lagið. Ég vinn yfirleitt í 8 bar loopum og þegar ég er orðinn sáttur með loopurnar mínar set ég lagið upp í fulla lengd og skipti niður í kafla og bæti við ef mér finnst eitthvað vanta. Í lokin þegar ég er orðinn sáttur með allt, fer ég yfir öll hljóð, pana, laga endana á hverju einasta hljóði svo þau hljómi meira smooth og mixa allt í Yamaha HS7 monitorunum mínum. Þegar því er svo lokið geymi ég hljóðfælinn í möppu, oft mánuðum og jafnvel árum saman og hlusta og melti í mörgum mismunandi hljóðkerfum/heyrnartólum þar til ég er orðinn sáttur með soundið.

Hverjir eru þínir helstu áhrifavaldar og á hvaða plötu getur þú hlustað á endalaust?

Helsti áhrifavaldur er eins klisjukennt og það hljómar, náttúran. Ég hef eytt stórum hluta ævi minnar uppi á fjöllum á landi sem fjölskyldan mín á og kem náttúrulega upprunalega frá Austurlandi þar sem ekki er stór byggð og sú nánd sem ég hef alltaf haft við náttúruna allt mitt líf er þegar uppi er staðið minn helsti áhrifavaldur. Ég leita mikið í náttúruna fyrir ró og nota þau tækifæri einnig til þess að taka upp hljóð, sem síðar endar oft í skemmtilegum minningum frá fallegum stöðum, minningar sem poppa síðan upp í hvert skipti sem ég heyri hljóðin.

Tónlistarlega séð er minn helsti áhrifavaldur Madlib og sú plata sem ég get hlustað endalaust á er „Madvillainy.“

Á að fylgja plötunni eftir með tónleikahaldi?

Nei, þessi plata er meira upp á gamanið gert. Ég er líka búsettur í Tübingen í Þýskalandi svo það er ekki hlaupið að því að spila á tónleikum heima á Íslandi. Ég er hinsvegar tilbúinn með aðra plötu sem heitir „Empire“ sem þið munuð vonandi fá að heyra nóg af síðar á árinu. Hef verið að prófa hana á tónleikum hérna í Evrópu ásamt myndbandi sem ég bjó til fyrir tónleikana mína og það hefur verið að koma vel út.

Eitthvað að lokum?

Létt lund leysir alla hnúta.

Skrifaðu ummæli