KEX OG KÍTÓN KYNNA VÖK OG SAMARIS 21. DESEMBER

0

image005-1

Áttundu tónleikarnir í tónleikaröðinni KEX+KÍTÓN í samstarfi við Arion banka verða haldnir á KEX Hostel 21. desember næstkomandi þar sem fram koma hljómsveitirnar Samaris og Vök.  Hægt verður að horfa á beint streymi af tónleikunum í gegnum Facebook-síðu Arion banka.

samaris

Samaris

Hljómsveitin Samaris var stofnuð árið 2011 af þeim Áslaugu Magnúsdóttur, klarinettleikara, Jófríði Ákadóttur söngkonu og Þórði Kára Steinþórssyni raftónlistarmanni. Sama ár tóku þau þátt í Músíktilraunum og báru sigur úr býtum. Síðan þá hefur mikið vatn runnið til sjávar, þau gerðu samning við breska útgáfufyrirtækið One Little Indian, hafa ferðast víða um heiminn gefið út 3 plötur. Sú síðasta kom út núna í sumar og ber heitið Black Lights. Gerð plötunnar spannar yfir heilt ár og dregur innblástur sinn frá stanslausu flakki, ástum, örlögum og lífsreynslu hljómsveitarmeðlima yfir þetta tímabil. Platan er kraftmeiri og bjartari en annað sem sveitin hefur sent frá sér og auk þess hennar fyrsta útgáfa á ensku.

vok

Vök

Vök vakti fyrst athygli þegar hún sigraði Músíktilraunir árið 2013. Hljómsveitin spilar draumkennda, elektróníska popptónlist með indie áhrifum. Seiðandi rödd söngkonunnar Margrétar Ránar Magnúsdóttur er fyrirferðarmikil í hljómi Vakar auk þess sem fjarlægur saxófónleikur Andra Más Enokssonar spilar stóran þátt. Auk þeirra eru í hljómsveitinni þeir Ólafur Alexander Ólafsson (Gítar, Bassi) og Einar Hrafn Stefánsson (Trommur, Slagverk). Vök hefur gefið út tvær þröngskífur (EP), Tension (2013) og Circles (2015) sem innihalda þekkt lög eins og „Before,“ „Ég Bíð Þín“ og „Waterfall.“

Það er mikið um að vera hjá Vök þessa dagana en sveitin gaf nýlega út lagið „Show Me“ sem er fyrsta lagið af fyrstu breiðskífu sveitarinnar sem kemur út í mars mánuði. Vök hefur verið að vinna með Breska upptökustjóranum Brett Cox (Jack Garratt, Tusks).

KÍTÓN stendur fyrir konur í tónlist og er tilgangur félagsins er að skapa jákvæða umræðu, samstöðu og samstarfsvettvang meðal kvenna í tónlist. Þeim tilgangi er náð með auknum sýnileika, viðburðum og stöðugu samtali við tónlistarkonur á Íslandi. Samstarf KÍTÓN við KEX Hostel og Arionbanka rennur enn fremur stoðum undir það góða starf sem KÍTÓN er að vinna.

Með tilstuðlan KÍTÓN er umræðan um stöðu kvenkyns laga- og textahöfunda jafnt sem flytjenda orðin fyrirferðameiri en hún hefur verið undanfarna áratugi. Félagið fer þvert á allar tónlistarstefnur, strauma, bakgrunn, menntun og jafnvel má sjá konur í félaginu sem starfa við tónlist sem umboðsmenn eða hafa atbeini eða starfa af tónlistargeiranum. Félagið fer ört stækkandi og eru nú um 246 félagskonur skráðar.

Tónleikarnir hefjast kl. 20:00 og er aðgangur að tónleikunum ókeypis og allir velkomnir á meðan húsrúm leyfir.

Hér má sjá myndböndin frá fyrri tónleikum úr tónleikaröðinni:

Hér fyrir neðan má sjá myndband KÍTON fyrir vitundarvakningu um Sterkar Stelpur:

 

Skrifaðu ummæli