HILDA ÖRVARS KEMUR ÞÉR Í JÓLASKAP

0

Hilda Örvars. Ljósmynd/Daníel Starrason

Hilda Örvars gefur út geisladisk með jólalögum frá Íslandi og Norðurlöndunum. Upptökur fóru fram í Akureyrarkirkju, Stúdíó Sýrlandi og Hofi í ágúst og september. Að geisladisknum koma margir listamenn ásamt Hildu; Atli Örvarsson sér um að útsetja tónlistina á töfrandi hátt, Eyþór Ingi Jónsson leikur á orgel, Einar Scheving á slagverk, Greta Salóme á fiðlu, Ásdís Arnardóttir á selló og Kristján Edelstein á gítar. Upptökur og hljóðblöndun eru í höndum Steve McLaughlin.

Tekið í Akureyrarkirkju frá upptökum. Ljósmynd/Daníel Starrason

Lögin á geisladisknum eru bæði vel þekkt jólalög og önnur minna þekkt frá Norðurlöndunum með nýjum íslenskum textum eftir Sigurð Ingólfsson. Það aldin út er sprungið, Nú árið er liðið, Hátíð fer að höndum ein, Jól og Betlehemsstjarnan kalla fram minningar um angurværð liðinna jóla. Nú finn ég frið í hjarta, Bæn, Vetrarsálmur, Þá jólin koma og Kæra jólakvöld kveikja notalega Skandinavíska stemmingu. Heildarmynd plötunnar er friðsæl og fáguð þar sem hlustandanum er boðið í ferðalag um jól við heimskautsbaug.

Atli Örvarsson, Hilda Örvars, Greta Salóme. Ljósmynd/Daníel Starrason

Hljóðheimur jólalaganna á þessum geisladiski sameinar heillandi heim kvikmyndatónlistarinnar og þjóðlagatónlistar og niðurstaðan er einlæg og töfrandi með skínandi gleði, rétt eins og jólin sjálf.

Comments are closed.