Heldur styrktartónleika í tilefni fertugsafmælis síns

0

Trommuleikarinn og stuðboltinn Arnar Þór Gíslason verður fertugur 8. apríl og ætlar að því tilefni að halda styrktartónleika með mörgum af þeim hljómsveitum sem hann hefur spilað með síðustu áratugi, en þær eru fjölmargar og verður borin á borð sannkölluð tónlistarveisla. Tónleikarnir verða haldnir í Bæjarbíói í Hafnarfirði laugardagskvöldið 7. apríl og þar munu koma fram Dr. Spock, Ensími, Hjörvar, Írafár, Jónas Sig og Ritvélar framtíðarinnar, Lára Rúnars, Rúnar Þórisson, Súrefni, Mugison og Pollapönk og má segja að Addi verður þá allt kvöldið þar sem honum líður best, á bakvið trommusettið.

Miðaverð er aðeins 5000 kr. og fer hver einasta króna í góðgerðarmálefni sem eiga það sameiginlegt að efla hafnfirsk ungmenni í gegnum tónlist, en sjálfur er Addi fyrrverandi orkumikill hafnfirskur unglingur sem fann sína fjöl í tónlistinni. Lesa má nánar um þessi málefni hér fyrir neðan.

Miðasalan er hafin á Tix.is. Mjög takmarkað magn miða er í sölu þar sem aðeins er um þessa einu tónleika að ræða, en þeir sem eiga ekki heimangengt eða ná ekki í miða geta engu að síður lagt málefninu lið með því að fylgja þessum link: https://tix.is/is/event/5636/addi-40-ara/

Músik og Mótor er félagsmiðstöð sem sinnir tónlist og mótorsporti. Í tónlistarhlutanum geta unglingahljómsveitir fengið æfingaraðstöðu endurgjaldslaust. Í rýminu er lítið upptökustúdíó þar sem unga fólkið getur tekið upp demó og kynnst upptökuheiminum. Öll tæki og tól sem unga fólkið hefur aðgang að eru orðin gömul og er markmiðið að uppfæra búnaðinn.

Fjölgreinadeild Lækjarskóla er staðsett í Menntasetrinu við lækinn. Deildin hefur frá árinu 2004 þjónað unglingum í 9. og 10. bekk úr grunnskólum bæjarins.

Deildin hefur þjónað þeim unglingum sem ekki ná að fóta sig í sínum hverfisskóla og þurfa aðra nálgun í náminu. 200 unglingar hafa útskrifast úr deildinn og óhætt er að segja að lang stærsti hluti þeirra finnur sinn tilgang í lífinu, finnur framhaldsnám við hæfi eða störf í samfélaginu.

Fjölgreinadeild Lækjarskóla leggur áherslu á að „ENGINN GETUR ALLT – ALLIR GETA EITTHVAÐ!“

Skrifaðu ummæli