FULL AF LÍFI, FJÖRI OG ANGURVÆRÐ

0

eliza-raudur-veggur

Síðastliðinn þriðjudag 22.nóvember kom útt fjórða sóló breiðskífa tónlistarkonunar Elízu Newman sem kallast Straumhvörf.  Tónlistarkonan Elíza Newman kom fyrst fram í sviðsljósið með hljómsveit sinni Kolrössu Krókríðandi er þær sigruðu Músiktilraunir með látum hér um árið. Hún hefur starfað við tónlist alla tíð síðan og er fjölhæfur listamaður bæði sem lagahöfundur og flytjandi. Elíza hefur farið víða í tónlistarsköpun sinni, og samið allt frá pönki til óperu til eurovision-laga með smá stoppi á Eyjafjallajökli! Hún starfaði erlendis lengi og hefur gefið út fimm plötur með Kolrössu/Bellatrix, eina með hljómsveitinni Skandinavia og þrjár sóló plötur til þessa sem allar hafa hlotið lof gagnrýnenda bæði heima og erlendis. Verður því Straumhvörf tíunda breiðskífan sem Elíza gefur út á ferlinum.

eliza-parka
Nýja plata Elízu Straumhvörf var samin og tekin upp í Stereohóli í Höfnum á Reykjanesi með upptökustjóranum Gísla Kjaran Kristjánssyni sem hefur getið sér gott orð sem upptökustjóri og lagahöfundur í London og Osló siðastliðin ár. Hann hefur meðal annars unnið með listamönnum á borð við Roisin Murphy, Duffy, Katie Dennis og William Hut.

Lög Elízu á þessari plötu gætu verið líst sem rokkskotnu indí poppi með þykkum strengja útsetningum, glitrandi ukulele, gargandi gítar og blokkflautu sólói! Í söngnum er Elíza upp á sitt besta, tvinnar saman angurværð, húmor og krafti eins og henni einni er lagið.

Nú þegar hafa tvö lög af plötunni, Fagurgalinn og Af sem áður var, hlotið frábærar viðtökur og mikla útvarpsspilun á Íslandi.
Straumhvörf  kemur hjá Lavaland Records og verður fáanlegt á netinu um allan heim, þar á meðal Tónlist.is, Spotify og Itunes en Smekkleysa SM dreifir plötunni á Íslandi.

eliza

Albumm.is náði tali af tónlistarkonunni og svaraði hún nokkrum laufléttum spurningum.

Hvað er platan búin að vera lengi í vinnslu?

Þó nokkurn tíma myndi ég segja,  þrjú ár í  heildina en mesta vinnan fór fram í sumar og í haust.

Var auðvelt að vinna hana eða voru einhverjar hindranir á leiðinni?

Það var frekar erfitt að komast aftur í rétta gírinn, eftir að hafa eignast barn , fókusinn var allt annar og ég þurfti svolítið að hugsa þetta upp á nýtt. Alls ekki slæmt en algjörlega breyttur heimur! Ég komst upp á lagið með að skipuleggja tímann vel og þannig tókst okkur að klára þetta. Ég vann plötuna með Gísla Kristjánssyni  upptökustjóra og án hans hefði hún aldrei klárast. Hann er náttúrulega snillingur í að kveikja á lögum og draga það besta úr þeim.

Hvernig mundirðu lýsa plötunni?

Hún er full af lífi, svolítið af fjöri og svo smá angurværð líka. Við reyndum að hafa gaman af þessu og vorum ekkert að pæla í hvað er töff eða vinsælt eða útvarpsvænt bara það sem virkar fyrir lögin! Þetta gæti flokkast undir einhverskonar indie-rokk-popp/ söngvaskáld  en það eru margir litir sem koma fram sem passa ekki alveg inn í svona kassa.

Á að fylgja plötunni eftir með tónleikahaldi?

Já ég verð með útgáfu-kósí-jóla tónleika 11.des í Kirkjuvogskirkju í Höfnum og verð eitthvað að spila órafmagnað  á ýmsum stöðum fyrir jól. Eftir jól ætla ég svo að taka nokkur gigg með hljómsveit og láta reyna á lögin í allri sinni dýrð.

Eitthvað að lokum?

Já Áfram kennarar!

http://elizanewman.tumblr.com/

Skrifaðu ummæli