„Finnst gaman að prófa nýjar stefnur og fara út fyrir rammann”

0

Ljósmynd: Diana Sus.

Söngvarinn og lagasmiðurinn Ivan Mendez sendi frá sér á dögunum nýtt lag en það ber heitið „Lust“ og er synthasprengja með retró blæ. Lagið er að mestu unnið og hljóðritað í Stúdíó N19 en var síðan fullklárað undir handleiðslu Hauks Pálmasonar í hljóðverinu í Hofi.

„Þetta lag er nokkuð frábrugðið því sem ég hef verið að gera undanfarið en mér finnst gaman að prófa nýjar stefnur og fara aðeins út fyrir rammann. Ég er mikill rokkhundur í hjarta en á hinn boginn hef ég alltaf verið heillaður af hljóðgervlum og stórum hljóðheimum, ég held að þetta lag sé þarna einhverstaðar mitt á milli.“ – Ivan Mendez.

Ivan hefur verið iðinn við útgáfur þetta árið en ásamt því að gefa út 5 laga smáskífu og tvö tónlistarmyndbönd með hljómsveit sinni GRINGLO gaf hann einning út ábreiðu af laginu „Wild world“ eftir Cat Stevens og lagið „Say you love me now“ í samstarfi við Stefán Elí.

Ljósmynd: Diana Sus.

Lust var nánast týnt eða þangað til að vinur hans Ivan benti honum á það og þá var ekki aftur snúið.

„Ég byrjaði á þessu lagi fyrir tæpu ári síðan þegar ég var að ganga í gegnum tilfinningalega valkreppu. Síðan var lagið eiginlega bara týnt í skúffuni þangað til að ég fékk áminningu frá góðum vin, sem ég hafði sent lagið, um að klára það.“ – Ivan Mendez

Söngvarinn vinnur þessa dagana hörðum höndum við upptökur á nýrri smáskífu með GRINGLO en sú smáskífa verður gefin út ásamt þeirri fyrri sem ein breiðskífa í byrjun næsta sumars.

Lagið má finna á Spotify, iTunes, Deezer og öllum helstu veitum.

Skrifaðu ummæli