EINN FREMSTI JAZZGÍTARLEIKARI LANDSINS KEMUR FRAM Í HÖRPU

0

Á næstu tónleikum vordagskrá Múlans, miðvikudaginn 26. apríl á Björtuloftum, 5. hæð Hörpu, kemur fram kvintett gítarleikarans Andrésar Þórs Gunnlaugssonar. Andrés Þór er í fremstu röð íslenskra jazzgítarleikara og hefur tónlist hans hlotið góðar viðtökur. Á síðasta ári kom út fimmti sóló diskur hans sem inniheldur nýja frumsamda tónlist. Á tónleikunum leikur Andrés eigin tónlist, sérstaklega útfærða fyrir þennan kvintett þar sem meðleikarar hans eru ekki af verri endanum, þeir Jóel Pálsson, Kjartan Valdemarsson, Richard Andersson og Scott McLemore.

Tónleikarnir hefjast kl. 21:00 og fara fram á Björtuloftum, 5. hæð Hörpu og er miðaverð kr. 2.000, 1.000 kr. fyrir nemendur og eldri borgara, miðar fást í miðasölu Hörpu, harpa.is og tix.is

Spennandi vordagskrá Jazzklúbbsins Múlans heldur síðan áfram á miðvikudagskvöldum á Björtuloftum, Hörpu með 16 tónleikum til 17. maí. Flestir af helstu jazzleikurum þjóðarinnar koma fram í dagskránni, m.a. Björn Thoroddsen, Gunnar Þórðarson, Eyþór Gunnarsson, Tómas R. Einarsson, Sigurður Flosason, Einar Scheving, Þorgrímur Jónsson, Sunna Gunnlaugs, Erik Qvick, Ásgeir Ásgeirsson, Andrés Þór Gunnlaugsson, Scott McLemore, Ólafur Jónsson, Kjartan Valdemarsson, Haukur Gröndal og Jóel Pálsson og fleiri og fleiri.

Múlinn er að hefja sitt 21. starfsár en hann er samstarfsverkefni Félags Íslenskra Hljómlistarmanna (FÍH) og Jazzvakningar. Klúbburinn heitir í höfuðið á Jóni Múla Árnasyni sem jafnframt var heiðursfélagi og verndari Múlans. Múlinn er styrktur af Reykjavíkurborg, Tónlistarsjóðnum og SUT sjóðnum og er í samstarfi við Heims-tónlistarklúbbinn og Hörpu.

Skrifaðu ummæli