„Ég var lögð í mikið í einelti en hef alltaf fundið skjól í tónlistinni”

0

Ljósmynd: Isakmatt.

Þórdís var að senda frá sér frábæra ábreiðu af laginu „Slow Down” með hljómsveitinni The Lumineers. Þórdís er aðeins 17 ára, fædd og uppalin í Bolungarvík en er nú búsett á Akureyri þar sem hún er að læra listnám í Verkmenntaskólanum. Þórdís hefur verið mestmegnis syngjandi frá blautu barnsbeini og byrjaði pabbi hennar að kenna henni á gítar um 11 ára aldur.

„Tónlistin hefur hjálpað mér mikið í gegnum lífið. Ég var lögð í mikið í einelti þegar ég var yngri og hef alltaf getað fundið skjól í tónlistinni. Þegar mér leið illa kom pabbi yfirleitt inn til mín og hlustaði með mér á Eric Clapton og Kansas, spilaði með og kenndi mér gripin. Það hjálpaði mér mikið enda eru þeir enn í miklu uppáhaldi.“

Það er mikil tónlist í fjölskyldu Þórdísar en líkt og fram hefur komið var uppeldi hennar nokkuð tónlistartengt. Bæði foreldrar hennar, ömmur og afar hafa gruggað sitthvað í músík en stóri bróðir hennar er nú bassaleikari og bakraddasöngvari hljómsveitarinnar GRINGLO, sem nýverið gaf út eigið efni, ásamt því að hafa verið í öðrum sveitum.

Það lá því beinast við að hún hrifist mest af rólegum, kassagítaraleiknum rokklögum sem eflaust skýrir stíl hennar og lagaval til ábreiðu. Þórdís heyrði lagið, Slow Down með The Lumineers í fyrsta skiptið fyrir um tveimur árum og náði það strax til hennar. Hún pikkaði það upp á gítarinn og hugsaði með sér hvað það væri gaman gera ábreiðu (e.cover) af laginu.

„Ég hafði samband við Ivan Mendez, vin minn og forsprakkara GRINGLO, fyrir um rúmum mánuði síðan og bað hann um að hjálpa mér með þetta allt saman. Hann hefur reynslu og kunnáttu á þessu sviði enda iðinn við vinnu á eigin efni svo ég fékk mikla og góða aðstoð.“

Lagið er tekið upp í Stúdíói Hljómbræðra og N19. Pródusering og hljóðblöndun er öll unnin af Ivani Mendez.

Skrifaðu ummæli