Búseta í sjö löndum hefur haft djúpstæð áhrif á tónlist hvors um sig

0

Ljósmynd/ Ivana Ciric

Lagahöfundarnir Jelena Ciric og Marteinn Sindri Jónsson halda tónleika í Fríkirkjunni í Hafnarfirði  í kvöld 30. nóvember kl 20:00 með áherslu á ferðir og fjölmenningu.

Það að sýna á sér fararsnið merkir að undirbúa brottför, leggja upp í nýtt ferðalag, en þó má vel hugsa sér að orðið merki jafnframt eitthvað svipað og ferðalag – snið er sú mynd sem förin tekur á sig. „Fararsnið“ heita tónleikarnir sem tónlistarfólkið Jelena Ciric og Marteinn Sindri Jónsson halda í Fríkirkjunni í Hafnarfirði á föstudag. Lögin á efnisskránni eru frumsamin og snúast um ferðir með ýmsu sniði.

Jelena og Marteinn hafa búið í samtals sjö löndum og hefur sú reynsla þeirra haft djúpstæð áhrif á tónlist hvors um sig. Þau segja að hvort sem ferðast er um höf og lönd, í huganum eða í hjartanu, hafa slíkar ferðir ætíð einhverjar umbreytingar í för með sér.

Jelena fæddist í Serbíu, ólst upp í Kanada, og bjó í Mexíkó og Spáni áður en hún fluttist til Íslands árið 2016.

„Að semja lög er fyrir mig ein leið til að skapa heimili – og kannski líka skilja sjálfa mig betur og hvernig ég passa inn í umhverfið mitt.“ – Jelena

Marteinn Sindri fæddist á Íslandi en varði fyrstu æviárunum í Amherst í Massachusettsfylki í Bandaríkjunum. Auk þess að ala manninn á Íslandi hefur hann búið í Berlín í Þýskalandi þar sem hann lagði stund á heimspekinám. Áhrifavaldar Marteins í tónlist koma úr öllum áttum.

„Mínar tónsmíðar standa styrkum fótum í íslenskri bókmenntahefð og alþýðutónlist en er einnig fléttaðar saman við goðsagnaminni, popptónlist og sálmasöng,“ – Marteinn Sindri

Auk tónleikanna munu Marteinn og Jelena halda vinnustofur fyrir hóp barna frá Lækjarskóla, ásamt því að leika tónlist sína fyrir leikskóla og elliheimili í Hafnarfirði.

„Ég tel að merking laga okkar, með áherslu á ferðalög og fjölmenningu, sé mikilvæg. Okkur langaði til að koma henni fyrir augu og eyru sem flestra,“ – Jelena. „Þar sem það er svo stutt í jólin, þá munum við nota jólalög til að kanna það sem mismunandi menningarheimar eiga sameiginlegt,“ – Marteinn

Tónleikarnir eru haldnir í Fríkirkjunni í Hafnarfirði föstudaginn 30. nóvember kl. 20:00. Sérstakur gestur á tónleikunum er Daníel Friðrik Böðvarsson á gítar. Tónleikarnir eru styrktir af Hafnarfjarðarbæ og aðgangur er ókeypis.

Skrifaðu ummæli