BRYNHILDUR GUÐJÓNSDÓTTIR SYNGUR PIAF 19. DESEMBER Í HÖRPU

0

piaf

Brynhildur Guðjónsdóttir leikkona, sem sló í gegn í hlutverki Edith Piaf í leiksýningu Þjóðleikhússins, ásamt sjö manna hljómsveit undir stjórn Jóhanns G. Jóhannsonar, minnist frönsku söngkonunnar í tilefni þess að 100 ár eru liðin frá fæðingu hennar. Dagskráin telur mörg af frægustu lögum Piaf í glæsilegum útsetningum Jóhanns G. Um er að ræða fallega og áhrifamikla kvöldstund, í tali og tónum, þar sem Brynhildur og félagar töfra fram anda liðins tíma og heiðra frægustu dóttur Parísar, litla spörfuglinn Edith Piaf.

piaf 3

Franska söngkonan Edith Piaf fæddist þann 19. desember 1915, að því er sagan segir á frakka lögregluþjóns, undir götuljósi í Montmartre-hverfi Parísarborgar. Piaf var sannkölluð goðsögn í lifanda lífi og um vinsældir hennar enn í dag þarf ekki að fjölyrða, tónlistin lifir enn í hjörtum fólks og sífellt bætast nýjar kynslóðir í aðdáendahópinn. Fyrir réttum tíu árum var leikrit Sigurðar Pálssonar, Edith Piaf, frumsýnt á stóra sviði Þjóðleikhússins. Skemmst er frá því að segja að sýningin naut gríðarlegra vinsælda og var leikið fyrir fullu húsi tvö leikár í röð. Hefur tónlistin og sagan fylgt Brynhildi æ síðan. Í kjölfar þessarar velgengni verður minningu stórstjörnunnar Piaf haldið á loft á deginum sem markar eitt hundrað ár frá fæðingu hennar, laugardagskvöldið 19. desember 2015.

piaf 2

Hljómsveitina skipa:

Jóhann G Jóhannsson, píanó
Birgir Bragason, kontrabassi
Bryndís Pálsdóttir, fiðla
Eiríkur Orri Ólafsson, trompet
Haukur Gröndal, klarínett
Jóel Pálsson, tenór saxófónn
Margrét Arnardóttir, harmónikka

Hægt er að nálgast miða á Tix.is

Comments are closed.