Blúshátíð í Reykjavík hefst á morgun laugardag 19. mars, með Blúsdegi í miðborginni. Blúshátíðin leggur Skólavörðustíginn undir sig. Við setningu hátíðarinnar verður tilkynnt um val á heiðursfélaga Blúsfélags Reykjavíkur 2016. Boðið verður upp á lifandi blús víða á Skólavörðustígnum frá klukkan 14.00 til 16.00. Kveikt verður upp í grillunum og boðið upp á grillað bacon, kjúklingavængi og pylsur. Tónleikar Borgarbókasafn verða kl 16.00-17.00.
Stórtónleikar miðvikudaginn 23. mars kl 20.00.
Chicago Beau með Vinum Dóra, Sigurgeir Sigmundsson og Draumasveitin og Primecake.
Blúshátíð hefst með látum. Blúsjöfurinn Chicago Beau, heiðursgestur hátíðarinnar, kemur fram á opnunarkvöldinu með Vinum Dóra. Chicago Beau var tíður gestur hérlendis á árunum 1991 til 1995 og hann ferðaðist með hljómsveitinni víða um lönd. Nú getur áhugafólk um blústónlist endurupplifað galdurinn sem ávallt verður þegar Chicago Beau og Vinir Dóra spila saman.
Fyrir hlé verður gítarblúsinn í aðalhlutverki þegar Sigurgeir Sigmundsson og Draumasveitin spila lög af plötu Sigurgeirs í bland við blúsa frá Jeff Beck og Garry Moore. Í draumasveitinni eru kanónur á borð við Ásmund Jóhannsson á trommur, Jóhann Ásmundsson á bassa, Ingvar Alfreðsson á hljómborð.
Ungliðarnir í Primecake hefja tónleikana, það er flott byrjun á góðri hátíð.
Stórtónleikar á skírdag, fimmtudaginn 24. mars kl. 20.00.
Karen Lovely, Jonn „Del Toro“ Richardson, Þorleifur Gaukur and the Berklee youngbloods og Reykjavík Hipshakers.
Það er fengur fyrir íslendinga að fá söngdívuna Karen Lovely til landsins. Hún er ein skærasta stjarnan í bandaríska blúsheiminum um þessar mundir, margverðlaun söngkona sem hlakkar til að koma á Blúshátíð í Reykjavík.
Það lætur nærri að blúsbolinn frá Texas, Jonn „Del Toro“ Richardson hafi fæðst með gítarinn í höndunum. Hann hefur spilað allt sitt líf og þróað með sér persónulegan stíl þar sem blúsinn er blandaður áhrifum frá suðuramerískri tónlist. Hann er með rétta taktinn fyrir gesti Blúshátíðar.
Þorleifur Gaukur munnhörpuleikarinn knái hefur verið við tónlistarnám við Berklee háskólann og hann hefur dregið til landsins félaga sína úr skólanum. Þetta eru blúsmenn framtíðarinnar sem kalla sig Berklee youngbloods og hita upp fyrir Karen Lovely og Jonn Richardson.
Dagskráin hefst með Reykjavík Hipshakers, velmannaðri stórsveit sem matreiðir ferskan blús með kryddum úr Boogie Woogie og Ska tónlist með dassi af brassi.
Stórtónleikar föstudaginn langa, 25. mars kl. 20.00.
Frábær íslenskur blús.
Rjóminn af íslenskum blústónlistarmönnum kemur fram á lokakvöldi Blúshátíðar og bjóða upp á fjölbreyttustu íslensku blúsveislu sögunnar. Meðal flytjenda má nefna Andreu Gylfadóttur, KK, Ragnheiði Gröndal, Halldór Bragason, Guðmund Pétursson, Björn Thoroddsen, Óskar Logi Ágústsson úr Vintage Caravan og fleiri og fleiri og miklu fleiri. Þetta verður sannkölluð árshátíð íslenskra blúsista.
Það er leitun að bandi sem er meira töff en Hráefni sem hefja leik á lokakvöldinu. Valdimar Örn Flygerning syngur og spilar á gítar, Þorleifur Guðjónsson plokkar kontrabassa, Bergþór Morthens gítar og Þórdís Claessen lemur trommur. Það þarf ekki að segja meira.
Hér að neðan má sjá dagskrá hátíðarinnar:
Sunnudagur 20.mars
Borgarbókasafn kl 15 – 16, • Rithöfunda djamm og sagðar blússögur Chicago Beau , Árni Þórarinsson, Einar Kárason og Ólafur Gunnarsson
Mánudagur 21.mars
Blúskvöld Café Rosenberg kl 21 – 23.
Strákarnir hans Sævars og Siggi Sig
Tómas Ragnarsson og Götustrákarnir,
Þriðjudagur 22.mars
frá kl 20 – 22, Blúskjallarinn blúsdjamm hjá Íslenska Cadillac Klúbbnum
Faxafen 9 undir Salatbarnum
Davíð Þór Jónsson, Tryggvi Hubner og fleiri
Miðvikudagur 23mars
Stórtónleikar á Hilton Reykjavik Nordica kl 20
- Chicago Beau & Vinir Dóra
- Sigurgeir Sigmundsson og Draumasveitin.
- •Primecake
Klúbbur Blúshátíðar á Hilton
Fimmtudagur 24. mars
Stórtónleikar á Hilton Reykjavik Nordica kl 20
- Karen Lovely og Jonn „Del Toro“ Richardson,
- Þorleifur Gaukur & the Berklee youngbloods
- Reykjavik Hipshakers! .
Föstudagur 25.mars
Stórtónleikar á Hilton Reykjavik Nordica kl 20
- Frábær íslenskur blús
Andrea Gylfadóttir, KK, Ragnheiður Gröndal, Halldór Bragason, Guðmundur Pétursson, Björn Thoroddsen, Óskar Logi Ágústsson úr Vintage Caravan, Róbert Þórhallsson, Davíð Þór Jónsson Birgir Baldursson og fl.
- Hráefni Valdimar Örn Flygenring og co.
Klúbbur Blúshátíðar.
Umræðan