BARÁTTUTÓNLEIKAR Á KEX HOSTEL TIL STYRKTAR BÖRNUM FRÁ SÝRLANDI

0

unicef plaggat

UNICEF á Íslandi og KEXLand standa á fimmtudag, 17. mars, fyrir baráttutónleikum á Kex Hostel vegna stríðsins í Sýrlandi. Fimm ár eru liðin síðan stríðið hófst, innviðir eru í molum og meira en átta milljónir barna þurfa á neyðaraðstoð að halda í Sýrlandi og nágrannaríkjunum. UNICEF á Íslandi, KEXLand og fjöldi tónlistarfólks sameina krafta sína til að benda á að nóg sé komið af hörmungum í Sýrlandi og að tími sé kominn til að segja stopp. Aðgangseyrir tónleikanna rennur í neyðarsöfnun UNICEF á Íslandi fyrir börn frá Sýrlandi. Hljómsveitirnar gefa alla vinnu sína og KEXLand útvegar allt sem þarf til að tónleikarnir verði sem veglegastir. Auk þess útvegar Brimhljóð hljóðkerfi að kostnaðarlausu.

unicef 2

Aðgangseyrir er 1.500 kr en frítt er inn fyrir börn 12 ára og yngri.

Hægt er að senda SMS-ið TONLEIKAR í númerið 1900 til að kaupa miða. SMS-ið kostar 1.500 kr. Einnig er hægt að greiða við hurð.

Gestir eru hvattir til að mæta tímanlega. Tónleikarnir hefjast kl 17:30 og eru sem fyrr segir nú á fimmtudag, 17. mars.

Fram koma:

17:30 Amabadama

18:30 Sóley

19:30 dj. flugvél og geimskip

20:30 Kött Grá Pje

21:30 Milkywhale

22:30 Úlfur Úlfur

DJ Silja Glømmi mun þeyta skífum á milli atriða. Hleypt er inn á meðan húsrúm leyfir.

Fjöldi flóttafólks í nágrannaríkjum Sýrlands hefur tífaldast frá árinu 2012. Helmingur flóttamannanna eru börn. Síðan í september á síðasta ári hafa 400 börn drukknað á flóttaleiðinni yfir Miðjarðarhafið, að meðaltali tvö börn á dag.

„Það er með öllu óásættanlegt að börn drukkni í lekum bátum í leit að öryggi. Það er kolrangt að fjölskyldur hrekist á milli staða og viti ekki hvað bíður að morgni. Krefja þarf valdhafa um markvissar aðgerðir til að stöðva stríðið, veita þarf börnum og fjölskyldum þeirra neyðarhjálp og tryggja þeim alþjóðlega vernd. Við hvetjum fólk til að mæta á tónleikana, standa með okkur og segja stopp! Það er komið nóg af hörmungum í Sýrlandi,“   Bergsteinn Jónsson, framkvæmdastjóri UNICEF á Íslandi.

STOPP

Þrátt fyrir erfiðar aðstæður hafa UNICEF og samstarfsaðilar náð miklum árangri í Sýrlandi og nágrannaríkjunum og veitt milljónum barna neyðarhjálp frá því að stríðið hófst.

Tónleikarnir eru liður í átakinu #segjumSTOPP sem UNICEF á Íslandi stendur fyrir vegna þess að fimm ár eru liðin frá því að stríðið í Sýrlandi hófst.

Þau sem ekki komast á tónleikana geta sýnt samstöðu með því að styrkja neyðarsöfnun UNICEF á Íslandi:

www.unicef.is/syrland

http://www.unicef.is/

Comments are closed.