Alþjóðlegar rokkbúðir í Berlín og Evrópuráðstefna í Serbíu

0

MEME – Music Empowerment Mobility and Exchange er samstarfsverkefni 11 rokkbúðasamtaka víðsvegar um Evrópu, en verkefnið hlaut nýverið styrk frá Erasmus+, Evrópu unga fólksins. Íslensku félagasamtökin Stelpur rokka! leiða verkefnið, sem miðar að valdeflingu ungmenna og aukinni samfélagsþátttöku þeirra í gegnum tónlistarsköpun.

MEME verkefnið gerir yfir 110 ungmennum og sjálfboðaliðum frá 10 löndum kleift að koma saman og læra á hljóðfæri, mynda hljómsveitir, læra um frásögn og miðlun í fjölmiðlum og skiptast á reynslu sinni af verkefnastjórnun og skipulagi. Verkefnið er þríþætt og samanstendur af: undirbúningsheimsókn til Berlínar í júní 2018, ungmennaskiptum í formi alþjóðlegra rokkbúða í Berlín í júlí 2018 og ráðstefnu fyrir skipuleggjendur rokkbúða í Belgrad í Serbíu í september 2018.

Verkefnið stendur yfir í 7 mánuði og er, eins og áður sagði, leitt af Stelpur rokka! í samstarfi við gestgjafa rokkbúðanna í Þýskalandi, Ruby Tuesday e.V, og gestgjafa ráðstefnunnar í Serbíu, OPA/Femix. Einnig taka þátt í verkefninu: Fundacja Pozytywnych Zmian frá Póllandi, Girls Rock Dublin frá Írlandi, Girls Rock London frá Bretlandi, Girls Rock! Finland frá Finnlandi, JM / LOUD frá Noregi, Pink Noise frá Austurríki, Popkollo frá Svíþjóð og Stowarzyszenie Kobieca Transsmisja frá Póllandi.

Rétt eins og Stelpur rokka! starfa öll ofantalin samtök í anda rokkbúða-hreyfingarinnar, þar sem stelpur, trans og kynsegin þátttakendur læra á hljóðfæri, stofna hljósveit, semja lag og spila á tónleikum fyrir vini og vandamenn. Þau eru jafnframt öll meðlimir í regnhlífasamtökum rokkbúða um allan heim, Girls Rock Camp Alliance.

MEME verkefnið hlaut yfir 100.000 evrur í styrk frá Erasmus+ fyrir æskulýðsstarf í Evrópu, en styrkumsóknin hlaut 90 stig af 100 mögulegum. Markmið þessa metnaðarfulla verkefnis er að stuðla að auknu kynjajafnrétti og valdeflingu í krafti tónlistar og sköpunar, þvert á landamæri. Það byggir jafnframt á meðvitund um margþætta mismunun og hefur það markmið að berjast gegn hvers kyns jaðarsetningu á grundvelli fötlunar, uppruna, húðlitar og stéttarstöðu svo eitthvað sé nefnt. Á vegum Stelpur rokka! munu átta ungmenni og þrír leiðbeinendur ferðast til Berlínar í júlí til að taka þátt í alþjóðlegu rokkbúðunum, og um átta leiðbeinendur Stelpur rokka! munu ferðast á ráðstefnuna í Serbíu í september.

Auður Viðarsdóttir frá Stelpur Rokka! og verkefnastýra MEME segir: „Með þessu verkefni erum við að stuðla að listrænum og félagslegum samskiptum yfir landamæri í Evrópu og víðar. Hluti af okkar langtímamarkmiðum er að breyta tónlistarheiminum og samfélaginu öllu með því að hvetja stúlkur, trans og kynsegin fólk til aukinnar þátttöku og áhrifa. Hugmyndin að baki alþjóðlegu rokkbúðunum í Berlín og ráðstefnunni í Belgrad er að gefa þessu markmiði byr undir báða vængi.“

Maebh Murphy frá Ruby Tuesday og verkefnastýra MEME segir: „Við hlökkum til að taka á móti þátttakendum og leiðbeinendum í alþjóðlegu rokkbúðirnar í Berlín í júlí, og til að starfa með félagasamtökum sem eru virk í valdeflingu ungmenna í gegnum tónlist og sköpun. Við vonumst til að valdefla hvert annað, stuðla að nýjum viðhorfum til sköpunarferlisins og möguleika hverrar og einnar manneskju til að hafa áhrif.“

Frekari upplýsingar um MEME verkefnið má nálgast á heimasíðu Stelpur rokka!: www.stelpurrokka.org/. Við hvetjum áhugasama einnig til að fylgjast með hvernig verkefninu vindur fram á samfélagsmiðlum Stelpur rokka!

Stelpurrokka.org

Skrifaðu ummæli