ALÞJÓÐLEGA KVIKMYNDAHÁTÍÐIN RIFF HEFST Í DAG

0

Alþjóðleg kvikmyndahátíðin Riff (Reykjavík International Fil Festival) verður sett í fjórtánda sinn í dag þann 28. september og mun hún standa til sunnudagsins 8. október. Myndir hvaðan af úr heiminum frá 43 löndum allt frá Kyrgyzstan til Kanada og Kolombíu, 86 kvikmyndir í fullri lengd, 68 stuttmyndir, auk fjölda annarra m.a í barnadagskrá, samtals 226 myndir!

Sýningarstaðir að þessu sinni eru hið rótgróna Háskólabíó og Norræna húsið en RIFF mun einnig sýna myndir um alla borg, m.a Loft, Stúdentakjallaranum og Marina Slipp en einnig í einni stofnleið strætó. Opnunarmyndin Vetrarbræður verður sýnd í Háskólabíó og í framhaldi mun Dagur B. Eggertsson borgarstjóri formlega setja hátíðina í Listasafni Reykjavíkur, Hafnarhúsinu. Opnunarhófið verður hið glæsilegasta, sýning á verkum Pierre Coulebeuf og gjörningur Ernu Ómars og Íslenska Dansflokksins er meðal þess sem er á dagskrá.  Lokamynd RIFF er Borg vs. McEnroe sem sýnd verður í Háskólabíó.

Kvikmyndaveisla RIFF er mikilvæg menningarhátíð, uppskera kvikmyndagerðarfólks þar sem áhorfendur fá að njóta alls þess besta í alþjóðlegri kvikmyndagerð.

Sérstakur Finnskur fókus er á hátíðinni í ár í tilefni 100 ára afmæli fullveldis Finnlands. Að því tilefni verða nokkrar finnskar kvikmyndaperlur sýndar og þar á meðal Tom of Finland en hún er framlag Finna til Óskarsverðlaunanna í ár. Heiðurgestir hátíðarinnar að þessu sinni eru þýski leikstjórinn Werner Herzog og Olivier Assayas  en ásamt því að verk þeirra verða sýnd á hátíðinni munu þeir sitja fyrir svörum eftir sýningu mynda sinna og standa fyrir meistaraspjöllum fyrir áhugasama, svokallað Q & A.

Í aðalverðlaunaflokki hátíðarinnar Vitranir keppa 13 myndir um aðalverðlaun hátíðarinnar Gyllta lundann. Vitranaflokkurinn inniheldur fyrsta og annað verk leikstjóra en myndir í honum ögra oft viðteknum venjum í kvikmyndalist og er opnunarmynd RIFF, Vetrarbræður, í þessum flokki. Tíu myndir í fullri lengd eru sýndar í flokknum Fyrir opnu hafi en þar er um að ræða meistarastykki sem vakið hafa sérstaka athygli á kvikmyndahátíðum erlendis meðal annars lokamynd RIFF Borg vs. McEnroe. Í flokknum Meistarar eru sýnd verk kvikmyndahöfunda með einstaka sýn og magnaða hæfileika og í ár eru það Werner Herzog, Olivier Assayas og Valeska Grisebach sem hann prýða.

LUX verðlaun Evrópuþingsins beinir sjónum sínum að myndum sem fjalla sérstaklega um málefni almenning í Evrópu en RIFF sýnir þrjár myndir sem keppa um þessi verðlaun í ár, BPM, Sami Blood og Western.Í flokknum Önnur framtíð má finna áhrifamiklar kvikmyndir um mannréttinda- og umhverfismál en í þessum flokki keppa 11 heimildarmyndir sem taldar eru sérstaklega geta haft áhrif til góðs. Í sérstökum Heimildarmyndaflokki hátíðarinnar eru 16 myndir en myndir í þessum flokki geta haft virkilega sterk áhrif á áhorfendur og samfélagið í heild.

Ísland verður í brennidepli í sínum eigin flokki en í honum eru 34 eftirtektarverðar stuttmyndir, heimildarmyndir og myndir í fullri lengd. Líkt og undanfarin ár verður íslenskur stuttmyndaflokkur þar sem besta íslenska stuttmyndin verður verðlaunuð úr hópi 16 mynda sem valdar voru til sýninga.

Auk alls þessa verður yfir tugur sérviðburða á hátíðinni. Málþing um Norðurslóðir, ein sýning Improv Iceland, sérsýningar í Hafnarhúsinu, sýning á verkum Touko Laaksonen (Tom of Finland) og einnar mínutu myndir Egils Snæbjörnssonar svo fátt eitt sé nefnt.

Þá verður vönduð barnadagskrá á hátíðinni fyrir börn og unglinga á öllum aldri en Sérstök barnakvikmyndahátíð verður haldin í Norræna húsinu dagana 30. september til 1 október.

Hátt í hundrað erlendir gestir munu sækja hátíðina heim, bæði leikstjórar myndanna, framleiðendur, dreifingaraðilar sjálfboðaliðar og blaðamenn. Eins og undanfarin ár verða sérstakir Bransadagar á hátíðinni með sérstakri dagskrá fyrir okkar erlendu gesti, dagana. 4. til 6. október. Talent Lab verður á sínum stað en um 40 ungir kvikmyndagerðarmenn frá öllum heimshornum munu koma saman í Reykjavík til að sækja vinnusmiðjur og umræður, kynnast innbyrðis og sýna verk sín. Í samstarfi við Símann verða kvikmyndir af RIFF sýndar á VOD leigu Símans á meðan á hátíð stendur. 

Nánari upplýsingar á minna á Riff.is

Skrifaðu ummæli