19 ÁRA NEMI GEFUR ÚT SÍNA FYRSTU PLÖTU

0

Umer Consumer eða Ýmir Gíslason.

Tónlistarmaðurinn Umer Consumer eða Ýmir Gíslason eins og hann heitir réttu nafni var að senda frá sér sína fyrstu plötu sem heitir, „Salurinn.“ Ýmir er nítján ára og stundar hann nám við Menntaskólann í Hamrahlíð. Ýmir nennti ekki lengur að vera ekki búinn að gefa út þessa plötu og eftir það fór allt á yfirsnúning!

Albumm.is náði tali af kappanum og svaraði hann nokkrum spurningum um plötuna!


Hvenær byrjaðir þú að gera tónlist og hvernig kviknaði sá áhugi?

Línan milli þess að semja og spinna hefur alltaf verið afar þunn. Í fyrstu eyddi ég klukkustundum saman í spuna og þegar fór að líða á dagana voru stef og laglínur sem eftir sátu sem ég ákvað að vinna síðan með áfram. Þetta hefur svolítið snúist um að koma frá sér eins miklu rugli og mögulegt er og flokka það svo. Áhuginn hefur alltaf verið fyrir hendi og ég hef spilað á hljóðfæri síðan ég man eftir mér. Það var þó ekki fyrr en ég ákvað á hætta í hefðbundnu tónlistarnámi og fór að iðka listina á eigin forsendum sem ég fór að semja af viti.

Lögin hafa mörg svipaðan blæ en eru mjög ólík hvert fyrir sig.

Var platan lengi í vinnslu og hvernig mundir þú lýsa tónlistinni þinni?

Það var í lok Mars sem ég hugsaði með mér að ég nennti ekki að vera ekki búinn að gefa út þessa plötu, og eftir það fór allt á yfirsnúning. Ég fékk með mér alla mína nánustu félaga og allt í einu var þessi plata orðin að sameiginlegu verkefni heils vinahóps. Sum lögin eru ársgömul meðan eitt þeirra var samið fjórum dögum fyrir útgáfu. Ég stefndi á að gefa plötuna út fyrr en svo var fartölvunni minni stolið svo nánast öll vinnan glataðist, þá dugði ekkert annað til en að fylla bara upp í það sem hafði glatast og taka aftur upp þau lög sem eyddust.

Tónlistinni væri hvorki lýst sem indie rokki, post rokki eða raftónlist en það má staðsetja hana einhversstaðar í miðjum þríhyrningnum. Lögin hafa mörg svipaðan blæ en eru mjög ólík hvert fyrir sig. Ekkert af lögunum er fullelduð steik og birtingarmynd þeirra á plötunni er frábrugðinn þeirri tilfinningu sem ég hef fyrir þeim þegar ég flyt þau live.

Hvaðan færðu innblástur fyrir þína tónlistarsköpun og hverjir eru þínir helstu áhrifavaldar?

Ég sæki innblástur mikið inn í eigið líf sem kemur lítið á óvart en ég tek sjálfan mig út úr myndinni og Umer Consumer sér um að setja sögurnar í draumkenndara form. Ég hef alltaf verið heillaður af íslenskri textasmíði og langaði því að minnsta kostið að hafa fyrstu plötuna á íslensku. Þar horfi ég mikið upp til Moses Hightower en í tónlistinni hef ég orðið fyrir miklum áhrifum frá ADHD, Portishead, Sigur Rós og Kraftwerk að sjálfsögðu.

Á að fylgja plötunni eftir með tónleikahaldi?

Ég hef verið að spila hér og þar, gigg fyrir gigg, en núna eftir að platan er komin vil ég ótrauður fá að koma fram og halda áfram að koma tónlistinni á framfæri. Þessi plata hefur verið þröskuldur sem er gott að hafa stigið yfir.

Eitthvað að lokum?

Pössum upp á gögnin okkar!

Hægt er að hlusta á plötuna á Soundcloud.

Skrifaðu ummæli